وصفة كلاج بالجبنة والجوز

   
بنحط كل المواد بالخلاط وبنخفقها منيح حتى ما يضل كباتيل بالعجينة .
والمفروض العجينة تكون سائلة واخف من عجينة القطايف.
بتحطي قلاية جرانيت او تيفال ع راس الغاز وبتحميها وبس تحمى بتوطي الغاز .
بتحطي الخليط بابريق او دلة قهوة وبتسكبي مقدار مغرفة بالقلاية وبايدك بتحركي القلاية لحتى الخليط يغطيها وبتصبري شوية لحتى تنشف العجينة وبتقلبيها شوية وبتشيليها ،
ما بدنا العجينة تحمر بدنا اياها بيضة زي ما هي عشان نقدر نتحكم فيها ولانه بدنا نشويها بالفرن
بتفردي كل القطع اللي بتعمليهم على قطعة قماش لحتى يبردوا وبعدين بتصفيهم فوق بعض وبتغطيهم لحتى تجهزي الحشوة والقطر
نيجي للجبنة انا عملتها بحليب بودرة وطلعت تشهي خصوصا للحلويات:
بتجيبي طنجرة بتحطي فيها ٦ كاسات ماء فاتر وبتحطي لكل كاسة ٣ معالق حليب بودرة ممسوحين
بتحركيهم منيح لحتى يذوبوا وبتحطيهم ع النار وبتحركي لحتى يسخن الحليب بتضيفي مستكة ومحلب مطحونين وبتضيفي معلقة خل وعصرة ليمون
وبتحركيهم وبتغطيهم بعد ساعة بتلاقي الحليب فصل وصارت الجبنة لحال والمي لحال ،
بتجيبي قطعة قماش ناعمة ومغسولة ونضيفة وبتجيبي مصفاية ناعمة وبتحطي وعاء تحتها وبتسكبي الجبنة اللي بالطنجرة بقطعة القماش وبتربطيها وبتحطيها تتصفى لحتى ما يضل فيها ولا نقطة مي وبتضغطي عليها منيح لحتى تحصلي على جبنة حلوة وبنكهة المستكة وشي خرافي .
بتحشي قطع الكلاج قسم جبنة وقسم جوز زي ما هو واضح بالصورة
وبتصفيهم بسدر مدهون سمنة او زبدة وبتصفيهم وبتخبزيهم بالفرن بحيث يكون السدر مرفوع ع الشبك اللي فوق النار ،وبس يحمروا من تحت بتقلبيهم ،يعني ما بتشغلي الشواية ابدا ،
وبس يحمروا ع الوجهين بتشربيهم القطر وبتزينيهم بالفستق الحلبي
القطر : بتحطي السكر والمي وعصرة الليمون ومعلقة ماؤ الزهر  ع النار ولما يبلشوا يغلوا بتخليهم ٥ دقايق وبتتركيه يبرد
 واعتقد اني كفيت ووفيت وكتبت الطريقة بالتفصيل 
#كلاج ام نضال